ಗುಡ್‌ನ್ಯೂಸ್‌: ಬೆಂಗಳೂರಿನಲ್ಲಿ ರಸ್ತೆಗಿಳಿಯಲಿವೆ 100 ಹೊಸ ಬಿಎಂಟಿಸಿ ಬಸ್‌ಗಳು; ಎಲ್ಲೆಲ್ಲಿ ಸಂಚಾರ? ವಿಶೇಷತೆ ಏನು?

ಬೆಂಗಳೂರು: ರಾಜಧಾನಿ ಬೆಂಗಳೂರಿನ ರಸ್ತೆಗೆ ಬಿಎಂಟಿಸಿ ಹೊಸ ಬಸ್‌ಗಳು ಆಗಮಿಸಲಿವೆ. ಗುರುವಾರದಿಂದಲೇ ಒಟ್ಟು 100 ಹೊಸ ಬಿಎಸ್‌6 ಬಿಎಂಟಿಸಿ ಬಸ್‌ಗಳು ಸಾರ್ವಜನಿಕರ ಸೇವೆಗೆ ಲಭ್ಯವಾಗಲಿವೆ.

ರಾಜ್ಯ ಸರ್ಕಾರವು 336 ಕೋಟಿ ರೂಪಾಯಿ ವೆಚ್ಚದಲ್ಲಿ ಒಟ್ಟು 840 ಹೊಸ ಬಸ್‌ಗಳನ್ನು ಖರೀದಿಗೆ ಒಪ್ಪಿಗೆ ನೀಡಿದೆ. ಮೊದಲ ಹಂತದಲ್ಲಿ 100 ಬಿಎಸ್ 6 ಬಸ್ಸುಗಳು ಆಗಮಿಸಲಿವೆ. ಸಿಎಂ ಸಿದ್ದರಾಮಯ್ಯ ಅವರು ಗುರುವಾರ ಬೆಳಿಗ್ಗೆ ವಿಧಾನಸೌಧದ ಮುಂಭಾಗ ಚಾಲನೆ ನೀಡಲಿದ್ದಾರೆ.

ಏಲ್ಲೆಲ್ಲಿ ಸಂಚಾರ?

ಹೊಸ ಬಸ್‌ಗಳನ್ನು ಹೆಚ್ಚು ಪ್ರಯಾಣಿಕರ ದಟ್ಟಣೆ ಇರುವ ಪ್ರದೇಶಗಳಲ್ಲಿ ಓಡಿಸಲು ನಿರ್ಧರಿಸಲಾಗಿದೆ. ಪ್ರಮುಖವಾಗಿ ಮೆಜೆಸ್ಟಿಕ್‌, ಕೆಆರ್‌ ಮಾರುಕಟ್ಟೆ, ಯಶವಂತಪುರ, ರಾಜಾಜಿನಗರ, ಮೈಸೂರು ರಸ್ತೆ, ಕೆಆರ್‌ ಪುರ ನಿಲ್ದಾಣಗಳಿಂದ ನಗರದ ಹೊರ ಭಾಗಗಗಳಿಗೆ ಹಾಗೂ ನಗರದ ಪ್ರಮುಖ ಸ್ಥಳಗಳಿಗೆ ಹೊಸ ಬಸ್‌ಗಳು ಸಂಚಾರ ನಡೆಸಲಿವೆ ಎಂದು ಬಿಎಂಟಿಸಿ ಮೂಲಗಳು ತಿಳಿಸಿವೆ.

ಬಸ್‌ಗಳಿಗೆ ಭಾರೀ ಬೇಡಿಕೆ

ಗ್ಯಾರಂಟಿ ಯೋಜನೆಗಳಲ್ಲಿ ಒಂದಾದ ಶಕ್ತಿ ಯೋಜನೆ ಆರಂಭದಿಂದ ಬಸ್‌ಗಳಲ್ಲಿ ಸಂಚರಿಸುವ ಮಹಿಳೆಯರ ಸಂಖ್ಯೆ ಹೆಚ್ಚಾಗಿವೆ. ಈ ಹಿನ್ನೆಲೆ ಬಸ್‌ಗಳು ಸಾಕಷ್ಟು ಪ್ರಯಾಣಿಕರ ದಟ್ಟಣೆ ಹೊಂದಿರುತ್ತವೆ. ಪ್ರಮುಖ ಮಾರ್ಗಗಳಲ್ಲಿ ಸಂಜೆ ಹಾಗೂ ಬೆಳಗಿನ ಅವಧಿಯಲ್ಲಿ ಬಸ್‌ಗಳ ಕೊರತೆ ಎದುರಾಗಿದೆ. ಈ ಕಾರಣದಿಂದಲೇ ರಾಜ್ಯ ಸರ್ಕಾರವು ಬಿಎಂಟಿಸಿಗೆ 840 ಹೊಸ ಬಸ್‌ ಖರೀದಿಗೆ ಒಪ್ಪಿಗೆ ಕೊಟ್ಟಿತ್ತು. ಸದ್ಯ ಮೊದಲ ಹಂತದಲ್ಲಿ 100 ಬಸ್‌ಗಳು ಆಗಮಿಸುತ್ತಿರುವುದು ಪ್ರಯಾಣಿಕರ ಪಾಲಿಗೆ ಸಂತಸದ ವಿಷಯವಾಗಿದೆ.

• ಈ ಬಸ್‌ಗಳು ಪರಿಸರ ಸ್ನೇಹಿಯಾಗಿವೆ.
• ಬಿಎಸ್‌ 4 ವಾಹನಗಳಿಗಿಂತ ಅಧಿಕ ಇಂಜಿನ್‌ ಸಾಮರ್ಥ್ಯ
• ಬೆಂಕಿ ಅವಘಡಗಳಲ್ಲಿ ಮುನ್ನೆಚ್ಚರಿಕೆ ನೀಡುವ ವ್ಯವಸ್ಥೆ ಇದೆ.
• ಒಂದು ಬಸ್‌ನ ಬೆಲೆ 40 ಲಕ್ಷ ರೂಪಾಯಿ.
• ಅಶೋಕ್ ಲೈಲ್ಯಾಂಡ್‌ ಕಂಪನಿ ನಿರ್ಮಿಸಿರುವ ಬಸ್‌ ಇದಾಗಿದ್ದು, ಅತ್ಯುತ್ತಮ ಗುಣಮಟ್ಟ ಹೊಂದಿವೆ.

ಬಿಎಂಟಿಸಿ ಹೊಸ ಮಾರ್ಗದಲ್ಲಿ ಬಸ್‌ ಓಡಾಟ

ಬಿಎಂಸಿಟಿ ವತಿಯಿಂದ ನೂತನ ಬಸ್‌ ಮಾರ್ಗ ಆರಂಭಿಸಲಾಗಿದೆ. ಸಾರ್ವಜನಿಕ ಪ್ರಯಾಣಿಕರ ಅನುಕೂಲಕ್ಕಾಗಿ ಹವಾನಿಯಂತ್ರಣ ರಹಿತ ಸೇವೆಯಲ್ಲಿ ಯಶವಂತಪುರ ಕನಸವಾಡಿ ನಡುವೆ ಬಸ್‌ ಸಂಚಾರ ಮಾಡಲಿವೆ. ಮಾರ್ಗ ಸಂಖ್ಯೆ 253ಸಿ ಆಗಿದೆ. ಯಶವಂತಪುರದಿಂದ ಜಾಲಹಳ್ಳಿ ಕ್ರಾಸ್, ಚಿಕ್ಕಬಾಣಾವರ, ಹೆಸರಘಟ್ಟ ಟಿ. ಬಿ. ಕ್ರಾಸ್, ಕುಕ್ಕನಹಳ್ಳಿ, ಮಧುರೆ ಕನಸವಾಡಿಗೆ 1 ಬಸ್ಸು 4 ಟ್ರಿಪ್‌ ಸಂಚಾರ ಮಾಡಲಿದೆ. ಬೆಳಿಗ್ಗೆ ಯಶವಂತಪುರದಿಂದ 8.30 ಕ್ಕೆ ಮಧ್ಯಾಹ್ನ 12.05 ಕ್ಕೆ ಬಸ್‌ ಹೊರಡಲಿದೆ. ಕನಸವಾಡಿಯಿಂದ ಬೆಳಿಗ್ಗೆ 10.30, ಮಧ್ಯಾಹ್ನ 2 ಗಂಟೆಗೆ ಬಸ್‌ ಹೊರಡಲಿದೆ ಎಂದು ಬಿಎಂಟಿಸಿ ಪ್ರಕಟಣೆಯಲ್ಲಿ ತಿಳಿಸಿದೆ.